Ua aumai i se faai’uga a le Faamasinoga Maualuga a le atunuu le laolao e faaauau ai pea ona faaaogā e le Ekalesia a Iesu Keriso o le Au Paia o Aso e Gata Ai i Samoa, se vaega eleele o le fanua faaleaganuu o Alamutu i Levi Saleimoa i aiaiga o se lisi na faamauina ma lesitala faaletulafono i le masina o Iulai o le tausaga e 2013.
E tusa ma le 3 eka le telē o le fanua o loo lisi e faagaioi ai se malumalu tapua’i o lea ekalesia ma isi meatotino o loo iai, peita’i o le maliega a le Sa’o o le aiga e ana le fanua na faalavelaveina ma fesiligia e alo poo le fanau a le matai Sa’o e faasino iai le pule o le fanua.
O le māfua’aga lea na talosaga ai le ekalesia ma le Minisita o Puna’oa Faalenatura ma le Siosiomaga i le faamasinoga mo se poloa’iga lē tumau e taofia ai le soli atu o le fanua ma faalavelaveina ai galuega o loo faia.
Na talia e le Faamasinoga Maualuga le poloa’iga lē tumau ma taunuu ai i le faaulu loa e le ekalesia ma le Minisita o Puna’oa Faalenatura ma le Si’osi’omaga le matāupu i le faamasinoga e su’esu’e ai le lisi ma lona tulaga na faagaioia ai i le va o le Sa’o ma se sui sinia o le ekalesia o se tasi o tauaiga o le matai Sa’o e faasino iai le pule o le fanua.
Sa finau nisi o alo o le Sa’o sa molia e solitulafono le aiaiga na faatino ai le lisi, ae sa teena e le ekalesia ma le Minisita o lea matāgaluega a le malo o loo lesitalaina ai lisi o fanua tau Samoa.
I le mae’a o iloiloga o mau sa tuuina atu ua taunuu ai le faamasinoga i lana faai’uga o loo tusa ai ma ala o le tulafono le lisi ma ia faaauau pea ona faaaogā e le ekalesia le fanua.
Ua faia ai le poloa’iga a le faamasinoga ua faasā ai ona toe faalavelaveina le galuega o loo faagasolo a le ekalesia.
Ua faatonuina ai foi ē sa molia e totogi le aofa’iga e 65 afe tālā i le ekalesia ona o aafiaga e māfua mai i le faalavelaveina o le galuega, ae lima afe tālā e totogi i le matāgaluega o puna’oa faalenatura ma si’osi’omaga.
