Ua faailoa ai nei e le sui faipule o le itumalo palota o Vaimauga 3 le afioga Taioaliiseu Fiti Aimaasu, lona faamavae ma le tofi o le itumalo i le Palemene, ma lana faamavaega mai le vaega faaupufai sa tauva ai i le palota tele ia Aokuso o le tausaga ua mavae ma manumālō ai i le nofoa o Vaimauga 3, le vaega faaupufai e puipuia aiā tatau a tagata.
I se pepa o faamatalaga ua tuuina mai i le afioga i le faipule o loo ia faailoa ai foi e lē o se faai’uga faigofie ua ia faia i le tuana’i o ni masina o feiloa’i atu i vaega eseese o lona itumalo ma faailoa iai lana faai’uga.
Ae o ia foi feiloa’iga e pei ona faailoa e le afioga Taioaliiseu Fiti sa ia silafia ai le malosi o le lagolagoina e tagata o lona itumalo o le itu faaupufai o le a tauva ai i le palota laitiiti a Vaimauga 3 o le a toe faia.
Faaalia e le faipule o Vaimauga 3 e le’i māmā ia te ia lana faai’uga ma e le’i faia i sona to’atama’i poo se lē faaaloalo, ae e loloto lona agaga faafetai i le vaega e puipuia aiā tatau a tagata ma ona ta’ita’i faapea le aulagolago sa latou mafuta i ni tausaga se tele.
I le lotoifale o le patī faaupufai sa lagolago iai ma ana fuafuaga mo le atina’e ua faamatala le afioga Taioaliiseu i le pepa o faamatalaga, sa aafia ai ana fuafuaga mo le itumalo.
E faasino lea i le finagalo e suia le ta’ita’iga o le vaega faaupufai ma fuafuaga mo le atina’eina o Fono Faavae.
O le tuualalo a le suii faipule i e uma e lagolago i le HRPP e leo se faalata lana gaioiga ae o se faai’uga na tupu a’e i lona loto fuatiaifo.
O lana tuualalo i le aulagolago a le Faatuatua i le Atua Samoa ua Tasi, ua sauni e ofo lona tagata e tautua ma galue ai mo le lelei auiluma o le pati faaupufai.
