O le tasi le miliona valuselau afe tālā ua faamatuu atu i le toe faaauauina o galuega o le atina’e o itumalo faapalota e 51 lea o loo faafoe le faaaogāina e komiti a Fono Faavae, o le faaatoaga lea o le lima miliona o tausaga e lima o le poloketi mo le paea’iga ua mavae atu a le Palemene le paea’iga lea e 17 sa amata ai ona faatino lea polokalame a le malo.
Ua faailoa lea tulaga e le Minisita o le Matāgaluega o Tinā ma Tama’ita’i, Atina’e o Afio’aga ma Aga Fesoota’i o loo pulea ma vaaia le poloketi, a o lumana’i le tausaga faaletupe fou e amatalia ia Iulai o le tausaga nei o le a siitia ai i le lua miliona tālā vaegatupe e faamatuu atu i komiti a Fono Faavae o itumalo faapalota e 51 o le atunuu.
O le paea’iga 17 a le Palemene e faafā ona faamatuu le ta’i miliona ae na totoe ai le tausaga e tasi lea ua faaatoa i le amataga o le paea’iga fou 18 a le Palemene.
I le feiloa’iga a tusitala ma le Minisita le afioga Moefaauouo Julius Ah Kui Tafuna’i na ia faailoa ai e 23 Fono Faavae mai le amataga o le poloketi i le fā tausaga ua mavae e le’i oo atu lava lipoti o le faaaogāina o a latou seleni sa faasoa i atina’e eseese.
O se tasi lea o galuega o le a saga’i atu iai le komiti faatonu o le poloketi miliona o le iloiloina o ia lipoti e le’i taunuu atu.
Mai le Aso Faraile ua mavae ua faailoa e le Minisita e 6 itumalo ua faamatuu iai le ta’i miliona valuselau afe tālā, ae o loo iai le fuafuaga pe mae’a le vaiaso lenei ua ausia le 15 itumalo ua maua lea vaegatupe o le poloketi miliona.
