Ua faaaogā e tamaiti a’oga mai isi atunuu o loo fia aga’i mai e a’o’oga i iunivesite i Niu Sila nei, nisi tagata e ta’ua o le proxy viewer, e mua’i sa’ilia ma faamautū ni o latou potu poo ni fale e nonofo mautotogi ai iinei pe a tauuu mai.
O lenei faiga ua latou taumafai ai ina ia faamautinoa, e lelei potu o le a latou totogia e nonofo ai, ona o le tele o taimi e maua atu se tali ua talia a latou talosaga e omai ai e a’o’oga ae pe toe o ni nai vaiaso amata le semester ma faigata ai ona sa’ili vave ni fale lelei, mulimuli ane ua toe iloa le tele o ni mea o faaletonu i fale, ae ua uma ona saini konekarate mo le nofoia o na fale.
E mātele lenei faafitauli i tamaitai a’oga mai atunuu e pei o Saina, e faamoemoe tele i potu mautotogi e nonofo ai a o a’o’oga i Niu Sila, ae atonu e lē o se faafitauli mo fanau mai le Pasefika auā e to’atele o latou aiga i lenei atunuu e mafai ona faamautū mai iai.
O lea la ua amata ai se faiga fou o le totogi mai o se tagata na te faia le galuega o le mua’i sa’ili o ni fale poo ni potu mautotogi, ma ia pu’e atu video o vaega uma o le fale e vaavaai mai iai ina ia faamautinoa o ni potu lelei.
O se faiga lelei foi mo le to’atele o nisi fanau a’oga i iunivesite e mafai ona tilotilo iai, nai lo le na o le fai mai o fesoota’iga i luga o le initaneti ma kamupani o loo vaaia nei potu mautotogi, ma saini ai konekarate mo le nofoia, mulimuli ane e le’i mafai e le tamaitiiti a’oga ona silafia atoatoa isi vaega au’ili’ili o le fale e ono avea ma faafitauli mulimuli ane.
Puna o Faamatalaga: https://www.rnz.co.nz/news/chinese/588804/international-students-securing-auckland-rentals-by-proxy
