O le aoauli nei na maea ai le iloiloina o le mataupu e ala i le talosaga a le Peresetene o le Faamasinoga o Fanua ma Suafa Fepuleai Atilla Ropati mo ni poloaiga mai le faamasinoga e faaauau ai a latou galuega.
O le faaiuga na na tuuina atu e afioga i faamasino, le afioga Faamaisno Sili Satiu Smativa Perese, afioga faamasino sinia Vui Clarance Nelson ma le tmaaitai faamasino ia Niava Mata Tuatagaloa.
O lea talosaga na faasaga lea i le tuualalo a le Minisita o Faamasinoga afioga Matamua Vasati Pulufana na ave i le Pulega o le Mataglauega e logoina ai le Peresetene ina ia faatelegese ma taofi le faagasologa o a latou galuega aemaise o le filifilia o le Sui Peresetene lea na faatautō ia Tesema o le tausaga talu ai, o se Faamasino fou ma se Peresetene lagolago a Faamasinoga o Fanua ma Suafa.
Na afua le finau a le Minisita ona e le’o manino vaega o le tulafono lea na pasia i le tausaga e 2020 lea ua toe faatulaga ai le Faamasinoga o Fanua ma Suafa. O le poloaiga la a le Faamasinoga Maualuga ua tuu atu i le Matagaluega ina ia faatino tulaga masani i le ofo atu o le auaunaga i le aufaigaluega, i le Peresetene ma Faamasino o Fanua ma Suafa ina ia faapena ona faaauau ona tauave pea a latou tiute masani ma galuega o loo feagai ma latou.
O le isi vaega o le faaiuga ua tuuina atu o le tulaga i le filiifiliga o faamasino mai le faamasinoga o le 1981 lea ua soloia ma faaleaoga agai atu i le fesuiaiga o le tulafono fou o le 2020. Ua faapea mai ai le faaiuga “Ua na’o faamasino, e aofia ai le Peresetene sa filiiflia mai le tulafono o le 1981 o loo faaauau pea, mai aiaiga o le fesuiaiga o tulafono ia e lua o loo iai pea a latou malosiaga faafaamasino e faatino ai o latou tiute ma galuega fai.”
Peitai o Faamasino na filiiflia mai i lalo o le aiaiga o le Faamasinoga 2020 ua iai le fautuaga e toe ave luma o le palemene ina ia faatino ai seisi gaioiga ina ia mafai ona faamalieina aiaiga o le tulafono i le faia o filifiliga ia tusa o ala o le tulafono. O lona uiga o soo se Faamasino na filifilia i lalo o aiaiga ia o le tulafono 2020 lea faatoa amata i le tausaga na te’a nei e lē aloaia.
O le afioga i le Loia Sili Su’a Hellene Wallwork na tulai mo le afioga i le Minisita ae o le tamaitai Loia ia Leilani Tamati na tulai mo le Peresetene o le Faamasinoga o Fanua ma Suafa.
