E siiia ma le 30 afe tagata ua toe foi ane i o latou fale i le asō ina ua tau tuuitiitia mai timuga i le tele o vaega o Sini na lolovaia ma ua vaaia foi le susulu o le la.
Peitai fai mai lipoti e lei taitai mae’a ona alu ese mai le vai mai nisi o fale na aafia aemaise foi o siomaga aemaise lava i le Hunter region ma vaega e lalata i vaitafe e pei o le Hawkesbury.
O le asō ua agavaa ai tagata e talosaga mo fesoasoani mai le malo mo tagata na aafia i lologa lea e afe tala e agavaa iai le au matutua ma le ta’i 400 mo tamaiti i se aiga na aafia.
O loo faatumauina pea poloaiga mo le agai ese poo evacuation orders i nisi o vaega o Niu Sa Uelese ae o le mau a le to’atele ua lē lavavā fai pea lea masani o le tapena ma toe faatulaga o mea faaleagaina mai lologa aemaise le tele o meatotino tāua ua faaleagaina uma e le vai.
