O se finagalo o le Pulega Faatonu e faasino i le Palemia ma lana Kapeneta faapea le Loia Sili a le Malo, se faai’uga o le Tulafono Teuteu o le Faavae ma le Tulafono o Fanua ma Suafa o le tausaga e 2020 lea ua mae’a ona talanoaina e le Paleme le lipoti a le Komiti su’esu’e faapitoa a le Palemene sa su’esu’eina mafuaaga o le eseese o lomiga e 4 o ia tulafono e lua e mafua i se tuualalo mai le Loia Sili a le Malo. Ua pasia ai e le Fono Aoao faitulafono le lafo faatū a le tamaitai Palemia ma le faigamalo i le mae’a o felafolafoa’iga i le Aso Faraile na te’a nei, ina ia talia faataatia le fautuaga muamua a le komiti i le faasolomuli i tua o ia tulafono ae se’i toe foi i le Pulega Faatonu mo nisi iloiloga e faavae i finagalo ua folasia e sui usufono o le Palemene.
O le atoaga o le Fautuaga autu muamua a le Komiti su’esu’e faapitoa ua faataatia ese i le lafo, e faitauina faapenei:
“Ia vave faamatuu ese pe faasolomuli Tulafono nei e lua (2) ua aafia ona o suiga ua faatino faasolitulafono e se tagata poo ni tagata, ae ua talitonuina e le Komiti e lē o le atoaga lea o nei Tulafono sa pasia e le Palemene, ua mafua ai ona maua nei lomiga eseese e fā (4). O lea fautuaga ua faataatia atu ai e lenei Komiti su’esu’e faapitoa a le Palemene, ua mae’a le galuega a le komiti lava latou ia, ae ua taatia atu i le Kapeneta ma le Palemene e ou Tulafono e lua, ua talitonuina le matuā faaletonu (satia) i le aga’i atu i le Tulafono o Soligatulafono ona o le Palemene lava e fausia, suia, soloia, ana ia lava tulafono, e aunoa, aunoa lava ma se isi malosi’aga e ono atagia ai le lē tumati’e o le Palemene o Samoa (Parliament Sovereignty/Superamcy of Parliament).
O fautuaga e 2, 3, ma le 4 ua talia e le Palemene ma o le a silasila iai le Pulega Faatonu poo le Kapeneta ma le Loia Sili, e aofia ai le toe silasila o le Palemene i le fuata’iga o Tulafono e aiaia ai le faagasologa o Tulafono a Samoa poo le Legislation Act for Samoa. O le agaga o le komiti i lea fautuaga ia faama’oti sese tau ofisa, ma sese tau lomiga ma isi ituaiga suiga e ono oo atu ai sē ua faia ia suiga i se tulaga ua soli ai le Tulafono.
O le a silasila foi le Pulega Faatonu ma le Loia Sili i se Tulafono e tuuina atu faatasi ma le Tusi Faamaonia o Teuteuga mo le sainia e le Ao o le Malo, e pei ona fautuaina e le Komiti su’esu’e faapitoa le tuuina o le faamau faailoga a le Ao o le Malo i itulau uma o le Tulafono e aofia ai, le faavaa malo poo le Certificate of Amendments ma le tino o le Tulafono. O lea faiga ua manatu le komiti o le a lē mafai ai e soo se tasi lava, ona toe faia ni suiga ma toe lomia nisi kopi o Tulafono, e ese mai le ulua’i lomiga aloaia.
I le ma le fautuaga lona 4 o le a faapena foi ona silasila iai le Pulega Faatonu i le Palemia ma le Kapeneta ma le Loia Sili a le Malo, o le mautinoa ma le talitonuina e le komiti su’esu’e faapitoa le solia e i latou na faia suiga i tulafono a le Palemene Mamalu o Samoa, e aunoa ma le uia o Tulafono Tumau 113, ma ua atagia ai le matuā solia o le Vaega 9 (5) o Tulafono o le Fetuuna’iga ma Lomiga Faasalalau o Tulafono 2008 faatasi ai ma le Tulafono Tumau 186 (d) & (e). O le fautuaga lona 4 lea ua fautua ai le komiti su’esu’e faapitoa ina ia faasee atu lea tulaga i le Loia Sili ma le Matagaluega o Leoleo mo ni moliaga talafeagai faasolitulafono faasaga ia i latou uma o aafia.
