Ua toalua nei tagata ua molia i le fasioti tagata faamoemoeina i le faalavelave na tupu i Brisbane i le vaiaso talu ai na maliu ai Timothy Van Vo, e 38 tausaga le matua.
Na lipotia atu foi i talafou le faalavelave lea na fanaina ai se tagata i fafo ane o se fale i le faaitu lea i Oxley i le taeaopo o le Aso Lua talu ai.
O le faalavelave e pei ona iai i le lipoti e aofia ai se kulupu o tagata na agai atu ma auupega o fana.
O Andrew Van Mason 26 tausaga na ave e leoleo i le Aso Tofi ma ua molia nei i le fasioti tagata faamoemoeina.
Na molia foi i le faaaoga faasolitulafono o se taavale e aunoa ma se faatanaga mai lē e ana le taavale.
O le asō na fofoga ai le mataupu i le faamasinoga ma ua toe taofia nei e leoleo lea alii.
E toalima isi tagata na pueina mai i McKenzie lea fai mai leoleo na maua iai i le potu e gaosi ai le fualaau faasāina o le aisa.
O le isi ua molia muamua i le mataupu lea e 30 tausaga mai East Brisbane na pue e leoleo i le Aso Faraile.
