Ua ave le faafetai a le Matāgaluega o Leoleo, Falepuipui ma le Toe Fuata’ina i le pulenuu ma nisi o matai o le afio’aga o Vaimoso, sa lagolago ane i sa’iliga ma su’esu’ega ua mafai ai ona molia ni alii talavou se to’afā, ua tuua’ia i le faaoolima i se tama a’oga o le kolisi maualuga a le Ekalesia a Iesu Keriso o le Au Paia o Aso e Gata Ai i Pesega.
O le aoauli o le Aso Faraile ua mavae na molimauina ai lea gaioiga ina ua salalau i le api o foliga se ata video o loo faailoa ai le osofa’i e ia alii talavou o le tama a’oga o lea kolisi a o savali i se vaega o le alatele i Vaimoso o loo iai le ala laupapa.
O lea ata pu’e na fesoasoani tele i le galuega a leoleo aemaise o imeli mai nisi o tagata lautele.
