O se tala faate’ia mai Iapani ina ua tagatavaleina se tasi sa avea ma Palemia o lea atunuu, Shinzo Abe, a o faia sana lauga faalauiloa i le aso ananafi, Aso Faraile, Nara, e 480km i le itu i Sisifo o Tokyo, a o lumanai ai le faigapalota i le Aso Sa nei mo le maota maualuga a le palemene o le atunuu, e pei ona ta’ua mai i lipoti a le faletelevise NHK a le atunuu.
Faapea lipoti, a o faasolo le tautalaga a Abe, ae faafuase’i ona faalogoina le pā faalua o se fana, ma vaaia ai le palasi ifo i lalo o Abe. Sa faatope atu i le falema’i mo le tau lavea’ina o lona soifua peitai na maliu ai lava ina ua taofi le tātā o lona fatu mai manu’aga na lavea ai i se pulufana.
O loo iai i luga o le facebook se tusitusiga faamaise a le afioga i le Tamaitai Palemia o Niu Sila, Jacinda Ardern e faailoa ai lona faanoanoa tele ina ua maua mai lenei tala mai se tasi o ta’ita’i sa ia manatua lelei i ona uiga tausaafia.
Faapea mai Ardern, o Shinzo Abe o se tasi lea o ta’ita’i muamua o le lalolagi na ia feiloai atu i ai talu ona tulai mai o ia o le Palemia o Niu Sila. O se tamalii e iai ona uiga e manatunatu mamafa ma agaalofa foi. O Shinzo Abe, o ia foi o le Palemia pito sili ona umi le taimi sa tulai mai ai lea tofi o le malo, e pei ona avea ma Palemia o Iapani ae o le Peresetene foi o le Liberal Democratic Party mai le tausaga 2006 e oo i le 2007 ona toe tulai lea i le tofi i le tausaga e 2012 e oo mai i le 2020.
Na pu’eina ma taofia e leoleo se alii e 41 tausaga o Yamagami Tetsuya i Nara City, i le moliaga o le taumafai e faaoo le oti i se tasi, ma na lipotia mai le mauaina ai o se fana i le nofoaga lava na tupu ai le faalavelave.
O lenei osofa’iga mata’utia o se tala e matuā faate’ia ai, ona o Iapani e iloga o se tasi o atunuu o le lalolagi e pito sili ona saogalemu ma o se atunuu foi e matuā mamafa ana tulafono i le puipuiga mai le faaaogāina o fana.
