Talu mai le aso mulimuli o Fepuari le aso 28 lea na amata ai ona tufa le fesoasoani tupe e 150 a le tagata mo le toe a’e o a’oga a le fanau, e oo mai i le taeao o le Aso Lulu o lenei vaiaso ua 2 miliona 677 afe ma le 800 tālā le tupe ua alu i tua mo lea fesoasoani mai Fono Faavae a itumalo e 26.
Ua faailoa e le Matāgaluega o Tinā ma Tama’ita’i, Atina’e o Afio’aga ma Aga Fesoota’i lea tulaga atoa ai ma le aofa’iga o tagata ua tauaao a latou ta’i 150 tālā lea e 17 afe 852.
I lea aofa’iga e 8,945 le itupa o alii ae 8,907 tama’ita’i.
O ia fuainumela ua aofia ai le 386 tagata e iai aafiaga tumau ma le 1,182 o tamā ma tinā matutua ua penisione.
O isi faamaumauga ua faailoa lautele e le matāgaluega o le matutua o i latou ua maua lea fesoasoani tupe e pei ona faailoa o pepe faato’ā fananau e oo i le 4 tausaga le matutua ua maua tupe e 2,264, fanau i a’oga tulagalua mai le 4 i le 12 tausaga e 4,124, o fanau mai le matutua o le 13 i le tausaga e 2,464 ma le matutua mai le 19 i le 24 e 1,343.
O tupulaga matutua i le va o le 25 ma le 34 tausaga e 1,847, 35 i le 44 tausaga le matutua e 1,612, o i latou ua aulia tausaga litaea i le va o le 45 ma le 64 tausaga o le soifua e 3,016 ma matua tausi ua aulia tausaga penisione ma sili atu e 1,182.
Ua na o le 4 masina o loo tufa ai lea fesoasoani tupe ma e tatau ona mae’a Iuni e muta ai ma le tausaga faaletupe ua mae’a ona tufa le ta’i 150 tālā o le toe foi o fanau i a’oa’oga.
E 25 itumalo o loo faatali a latou tapenaga mo le faamatuuina atu o lea fesoasoani a le malo ua faaaogā iai le vaegatupe ta’i miliona valuselau afe tālā ua pasia e le Palemene mo le poloketi miliona o loo faasoa e Fono Faavae a itumalo faapalota mo le atina’e manuia o tagata o nuu ma afio’aga o le atunuu.
