Ua lata ina faamautū fausaga o tapenaga a le malo o Samoa mo le malaga muamua taualoa mai i Samoa a le afioga i le Palemia o Niu Sila o Christopher Luxon ma lana aumalaga.
E le’i faailoaina aloa’ia le polokalame ae ua faailoa i lipoti nisi o tapenaga a lo tatou malo, e pei o ni maliega poo Memorandum of Understanding poo MOU o le a sainia i le va o le alii Palemia o Niu Sila ma le Palemia o Samoa.
Ua iai foi le tapenaga mo le asia e Luxon o le uafu tele i Apia mo le molimauina o nisi o galuega ma atina’e o loo iai ma o loo fesoasoani iai lea malo.
Ua laumanu’ia foi se faaaloalo a le malo o Samoa e tusa o a tatou tu ma aganuu o le faaeeina lea o se suafa matai o le alii Palemia lea o le a faatino e le afio’aga o Apia.
O le galuega o le maketi fou i Savalalo sa fesoasoani malosi iai le malo o Niu Sila i lona faatupeina o le a tatala aloa’ia foi e le alii Palemia o lea malo tuaoi.
