O loo sa’ilia e le ofisa o femalagaa’iga a Niu Sila, le Immigration New Zealand ni tagatānuu Initia e to’a 11 o lea ua faamaonia ua nonofo nei faasolitulafono i totonu o le atunuu.
O i latou nei o ni sui o se vaega faafiafia a le Indian Holi, o se vaega to’atele e to’a 18 na malaga mai i Niu Sila i ni visa asiasi pupuu, e faafiafia faatasi ma le tama’ita’i pese Bollywood o Shibani Kashyap i le faamoemoe na faia i Pukekoe, le “Colours in the Park”.
I le ‘oto’otoga o lenei matāupu o loo ta’ua ai, e oo mai ananafi, le aso 9 o Mati, 2026, ua faamaonia e to’a 11 i latou ua ova aso o loo nonofo ai i Niu Sila, ina ua uma le aogā o latou visa i le Aso Faraile talu ai, aso 6 o Mati.
E to’a 4 isi o lenei vaega o loo aogā, pe o loo lelei pea o latou visa asiasi na omai ai.
E to’a 3 i latou ua toe foi ina ua moomia ona toe tuua le atunuu ua uma le aogā o visa.
O nisi o faamatalaga na maua mai le su’esu’ega o lenei matāupu ua ta’ua ai, a o le’i taunuu mai lenei vaega i Niu Sila, na māua ai e le ofisa o femalagaa’iga a Niu Sila e toetoe o le 1/3 o le ulua’i vaega e to’a 27 na talosaga mo ni visa, sa latou tuuina atu ni faamatalaga lē sa’o e faasesēina ai le ofisa.
Ina ia mafai ona māta’itū lelei lamatiaga mai na faiga taufaasesē, na talia ai e le ofisa na o visa e 13 o le ‘au faafiafia, ma faatapulaa foi le umi e nonofo ai i le na o le taimi mo le faafiafiaga.
E ui lava i tulaga faaletonu lea na tula’i mai i talosaga na fai, ae sa faamaonia lava e le ofisa o femalagaa’iga a Niu Sila le talafeagai ona faataunuu pea le faamoemoe sa tapena ina ua mae’a ni soālaupulega na faia ma le Konesula Aoao o Initia i Aukilani, na ia faamautinoa ane ai lana lagolagosua i le faamoemoe.
Ta’ua e le ofisa o femalagaa’iga a Niu Sila, o soo se tagata lava e nofo pea i le atunuu ae ua muta le aogā o se visa na malaga mai ai, o lona uiga o lea ua nofo faasolitulafono, ma ua lamatia ai foi i se faasalaga e faia iai ma toe faatietie i le tipoti i lona atunuu.
Puna o Faamatalaga: https://www.newstalkzb.co.nz/news/auckland/immigration-new-zealand-hunts-missing-indian-holi-performers-after-visas-expire/
