O le faaaogāina o tupe e komiti o Fono Faavae i ta’iala o le poloketi o le miliona mo le atina’e o itumalo faapalota uma e 51, o se tasi lea o vaega tāua ua aiaia i le tulafono taufaaofi e faatūina ai le pulega fou o le a pulea ma vaaia lea taumafaiga a le malo.
Ua faailoa e le Palemia le fausia o ia aiaiga i le tulafono taufaaofi sa tuuina atu i se tulaga faanatinati mo le talanoaina e le Palemene ma faia iai se faai’uga i taualumaga a le fono aoao faitulafono i lenei vaiaso e pei ona sa fono po le Palemene i le Aso Lulu ona o le tau faamae’aina o le faasoa o finagalo a sui usufono i lea tulafono taufaaofi.
Na faailoa e le faipule o Faleata 1 le afioga Faumuina Opapo Soana’i Oeti i lana saunoaga faalaua’itele i le tulafono ona popolega i le faaaogāina o tupe, ona e lē o iai ni aiaiga i le tulafono e puipuimalu ai.
O atugaluga o le sui faipule e māfua mai i le tufaina o le 150 tālā mo le fesoasoani a le malo i le toe a’e o fanau i a’oga.
Ae sa faailoa e le Palemia faapea le minisita o loo iai le vaaia o le poloketi o loo lima ta’ita’iina le faaaogāina o tupe i ta’iala ma tulafono o tupe a le malo.
Ni vaega o finagalo o le afioga i le Palemia susuga Laaulialemalietoa Leuatea Polataivao Fosi ma le sui faipule o Faleata 1 afioga Faumuina Opapo Soana’i Oeti i taualumaga a le Palemene i le Aso Lulu.
O le tulafono taufaaofi e faatūina ai le pulega fou e vaaia ma pulea le atina’e o itumalo ua aiaia ai foi le tuuina atu o le vaaia o galuega faatino a Sui Tama’ita’i ma Sui o Nuu i Fono Faavae, faapea ma le faagaioia o le fesoasoani a le malo i vaegatupe o loo faamatuu atu i le fesoasoani mo a’oga uma a le atunuu.
A pasia lea tulafono, ona faamuta lea o le vaaiga a le Matāgaluega o Tinā ma Tama’ita’i, Atina’e o Afio’aga ma Aga Fesoota’i o le poloketi.
O le a suia ai foi ma le igoa o lea matāgaluega ma faaigoina o le Matāgaluega o Aiga.
