Ua sauni le vaega o loo mata’ituina le saogalemu o taumafa i le matagaluega o le soifua maloloina, e molia i le tulafono faleoloa ma ē o loo gaosia oloa tau taumafa o loo faatau atu i le lautele o le atunuu, ae e lē o usitaia aiaiga o le faatauina o oloa tau taumafa.
O asiasiga masani a le vaega o loo mataituina le saogalemu o taumafa i faleoloa tetele e pei o supamaketi ma isi faleoloa aemaise o nofoaga o loo faatau ai oloa tau taumafa, na molimauina ai le faatau atu e nisi o faleoloa o ia oloa e aunoa ma ni faamatalaga e faailoa ai i tagata faatau poo ā ia oloa tau taumafa, ma isi faamatalaga auā e tatau ona silafia e tagata faatau.
O le tasi o aiaiga tāua o le faaaogā o gagana e lua le gagana Peretania ma le gagana Samoa e faailoa ai ia faamatalaga peitai e lē o tausisia lea tulaga.
O se tasi lea o faaletonu o loo molimauina e le toatele o nisi o oloa tau taumafa mai atunuu Asia e na o gagana a ia atunuu o loo faamatala ai se oloa, ae misi se faasamoa poo se faaperetania.
O faamatalaga tāua e tatau ona faailoa i se pepa, pusa, poo se container o fafao ai se oloa tau taumafa, o le ā le igoa o le oloa tau taumafa, o lona uiga faanatura, le mamafa o le oloa, lisi o vaega tāua o loo gaosia ai, ma le igoa ma le tuatusi o le kamupani ma le atunuu na gaosia ai ina ia mafai ona fesootai iai le tagata faatau.
E 5 afe iunite le faasalaga tupe poo le falepuipui i le 2 tausaga le faasalaga o le lē usitaia o aiaiga o le tulafono e faasino i le saogalemu o taumafa i totonu o Samoa.
