E lei manuia sui tauva e to’alua na tauva i fu’a a vaega faaupufai o le Faatuatua i le Atua Samoa ua Tasi ma le vaega e puipuia aiātatau a tagata i le palota laititi a Gagaifomauga Numera 2, ae o le tasi o sui tauva tuto’atasi e lagolago i le Faatuatua i le Atua Samoa ua Tasi ua manumalo i le nofoa o lea itumalo ina ua faailoa lautele le taunuuga o lea palota laititi i le faitauga aloaia.
O le sui ua manumalo i le tofi o Gagaifomauga Numera 2 o le afioga Fo’isala Lilo Tu’u Ioane i le aofa’iga e 441 palota na ia maua, tulaga lua ai le sui tauva o le vaega e puipuia aiātatau a tagata le tofa Sooalo Fineaso Poka Fineaso.
Ua tulaga tolu ai palota na maua e le isi o sui tauva tuto’atasi le afioga Falesāopule Vaialia Iosua e 287 palota na ia maua, tulaga fā ai le tofa Lomia Tauloa Moafanua Sia’aga i palota e 259 ma sa tauva mo le vaega faaupufai o le Faatuatua i le Atua Samoa ua Tasi.
E tasi le afe 367 (1,367) palota na faia ma sa lelei ona faatino i le aso o le palota laititi a lea itumalo faapalota sa toe saili ai sona sui usufono o le Palemene ina ua tuumalo faafuasei le afioga Va’ele Paia’aua Iona Sekuini, na filifilia i le palota tele ia Aperila o le tausaga na te’a nei.
O le aso 21 o Iuni e toe tauaofia ai le Palemene mo ana fonotaga faaauau ma o le a faatauto ai ma le faipule filifilia o Gagaifomauga Numera 2 le afioga Fo’isala Lilo Tu’u Ioane.
