O maliega ua mae’a sainia e le Palemia o Niu Sila ma Samoa lea e autū i le fesoasoani i leoleo ma le ofisa o le tiute i le leoina o tuaoi o le tatou atunuu mai le feavea’iina o fuālaau faasāina ma isi faiga solitulafono, o le a aumai ai ni ta’ifau sosogi ma ni masini fā’ata e le malo o Niu Sila e lagolago malosi ai i lea galuega o loo faia e leoleo ma le ofisa o le tiute.
Ua faailoa e le ta’ita’i o le tatou malo ia vaega ua faamautū i le maliega ua sainia, ma faailoa ai foi e le’i mae’a le masina lenei o Mati ua malaga mai ni leoleo se to’alima pe to’aono mai lea atunuu e fesoasoani i le galuega a leoleo i Samoa e faasino i le su’eina ma sa’ilia o faiga solitulafono e aafia ai nakoti poo fuālaau faasāina.
