O le gagana e mamana ma mamala, o le autū lea o le vaiaso atoa lenei o loo faatāua ai le gagana Samoa i a’oga uma i Samoa.
O se vaiaso o loo faagasolo ai polokalame o loo auai a’oga eseese a le malo, a’oga a ekalesia ma a’oga tuma’oti.
O le autū ua filifilia ua faavae mai i le loloto o le tatou gagana o loo faamatala ai lo tatou tupu’aga ma lo tatou talafaasolopito ia tatou tu ma aganuu.
O le nofoaga ua avea ma malae o aganuu ma measina a Samoa i Malifa na tatala ai le vaiaso o le gagana Samoa e le Minisita o a’oga ma aganuu le afioga Aiono Alec Ekeroma.
O le Aso Lulu o le a see atu ai le matāgaluega e tatala foi lenei vaiaso tāua i Savaii lea o le a tapuvae tasi polokalame uma i le maota tele poo le hall o le a’oga o le Don Bosco i Salelologa.
