Ua mae’a tuuina atu i luma o le Faamasinoga Maualuga folasaga a le loia o loo tula’i mo le vaega faaupufai e puipuia aiā tatau a tagata ua talosaga ai lea patī faaupufai i se poloa’iga lē tumau a le faamasinoga e taofia ai le faagasologa o galuega o le poloketi miliona.
O se talosaga ua finauina ai le faia o lea poloa’iga lē tumau se’i mae’a ona tagofia e le faamasinoga le lu’i faaletulafono a lea vaega faaupufai ua fesiligia ai suiga o ta’iala o lea poloketi a le malo e faasino i tofiga o ta’ita’ifono o komiti o Fono Faavae.
O loo finauina le tulaga ua suia ai nei nisi o ta’ita’ifono i sui sa tauva ma lagolago i le vaega faaupufai o le Faatuatua i le Atua Samoa ua Tasi ae e le’i manumālō i le filifiiliga o se tofi faipule o le itumalo.
Ua tuuina atu ai e le itu talosaga le ta’iala o lea poloketi na faaaogā ina ua faato’ā amata le poloketi sa aiaia ai ua na o sui faipule o itumalo i le Palemene e tauaveina tofi ta’ita’ifono.
Ua faaaogā ai foi e avea ma mau malosi a le itu talosaga mo se poloa’iga lē tumau nisi o suiga o le faaaogāina o tupe o le poloketi e faasino i le 150 tālā ua tufa mo le toe foi o fanau i a’oga.
E lē gata i folasaga a le loia o loo finauina se poloa’iga ua mae’a tuuina atu, ae faapea foi i folasaga a le loia mo le itu a le malo lea o loo lilifa i le teena o le talosaga mo se poloa’iga i mau faaletulafono o loo faavae ai.
O le mae’a o ia folasaga sa fofogaina i le Aso Gafua ua tālia nei se faai’uga a le afioga i le Faamasino Sili.
A o talia lea faai’uga sa molimauina i le amataga o lenei vaiaso le tumutumu o nisi o nofoaga o loo tufa ai le 150 tālā o le fesoasoani mai lea poloketi a le malo mo le toe foi o fanau i a’oga.
O se fesoasoani ua māfua ai ona tumutumu le ofisa o faigāpalota ia i latou ua aga’i e lesitala i lola palota e agavaa ai ona maua lea fesoasoani tupe.
