E to’afā fitafita Lusia ua o latou faailoa tulaga lē manuia ma sauāga na faia i mea o loo galulue ai i Ukraine, ma ua faamatala e nisi o i latou ia i le BBC, na o latou vaai i fitafita o fasiotia i le mea sa iai ona o le lē usita’ia o faatonuga.
Fai mai le mau a le isi o i latou nei, na ia vaaitino lava o fasioti se tasi o fitafita i le poloaiga a lana ta’ita’i’au pe ā ma le 2 mita mai le mea sa iai o ia.
Na molimau foi le isi fitafita i le lipoti lava lea a le BBC, na ia vaai foi o tafana e le ta’ita’i’au ni fitafita se to’afā e na te iloaina.
O isi o le to’afā lea na molimau foi i lo latou vaaia pe ā ma le 20 tinomaliliu o fitafita Lusia lava ua toe fasiotia lava e latou, ma e fai si ogaoga o faamatalaga a i latou nei ua faia i le polokalame o le documentary a le BBC o loo tuufaatasia i le taimi nei.
O loo sosola i le taimi nei i latou ia e to’afā ae maoa’e faamatalaga na o latou faailoa i le faatalanoaga ma le BBC.
O loo ta’ua i le lipoti se faamatalaga mai le malo o Lusia e uiga i ia faamatalaga ma ua ta’ua ai o faamatalaga faapea e matua’i su’esu’eina lelei.
Fai mai fitafita na faatalanoaina, e alolofa i lo latou atunuu ae ese le tulaga ua faia iai e Putin.
Puna o Faamatalaga: https://www.bbc.com/news/articles/cz7gw3l395ro
