O le alii o Frank Pritchard lea ua avea nei ma faia’oga o le Fetu Samoa, le aulakapi liki a tama’ita’i Samoa ma o le a sui tulaga ai i le faia’oga sa iai talu ai lea ua faamavae, Jamie Soward.
Fai mai le RNZ sa galulue faatasi Pritchard ma le faia’oga sa iai talu ai mo le tolu tausaga e siitia le tulaga o le Fetu Samoa mai le lona 24 sa iai i le faatulagana o ‘au a le lakapi liki, i le tulaga 4 ua iai nei i faatulagana faavaomalo.
O le alii o Pritchard sa taalo i le Liki mo le Penrith Panthers mai le 2003-2010 a o le’i see atu i le Canterbury Bulldogs i le 2011-2015.
Sa taalo foi i le Super League i Egelani i le 2016 ma ua tele foi lona sao i le taaloga.
E 27 taaloga faavaomalo sa taalo ai mo le Kiwis ma taalo foi mo le Toa Samoa i le Ipu o le Lalolagi i le 2017.
O lona uiga la o Pritchard lea o le a ta’ita’ia le ‘au a tama’ita’i i le Ipu o le Lalolagi i le tausaga nei lea e pulu faatasi ai le Fetu Samoa ma le ‘au a Ausetalia, Egelani ma Uelese i le Pulu A.
Puna o Faamatalaga: https://www.rnz.co.nz/international/pacific-news/586749/frank-pritchard-former-new-zealand-and-samoa-rugby-league-star-is-new-fetu-samoa-coach
