O le tāua o le malamalama i tulafono tau femalagaa’iga i le va o malo o le Pasefika atoa ai ma le tāua o le galulue faatasi o malo i le fetufaa’i o faamatalaga tau femalagaa’iga, o le autū lea o le afea o le ofisa autū o matāupu tau femalagaa’iga a le Pasefika o loo i Samoa, e le Loia Sili a le faigāmalo a Amerika Samoa ma le Sui Loia Sili a le faigāmalo a Tutuila ma Manu’a.
Sa auai ma nisi o ofisa sinia o le vaega o femalagaa’iga a le malo o Samoa ma maua ai se fetufaa’iga ma faauluuluga o lea auaunaga o loo galulue ai nisi o tamafanau a Samoa.
Ua faailoa i se faasalalauga i le upega tafa’ilagi a le ofisa o le Konesula o Samoa i totonu o Amerika Samoa o lea mafutaga sa faasoa ai finagalo i matāupu i lu’itau i le pulea o femalagaa’iga e faasino i tuaoi o atunuu aemaise o le tulaga i le taulimaina o isi faafitauli e aliali mai ai.
Sa faasoa foi finagalo i lea feiloa’iga i le tāua o le sao o galuega tau faamasinoga e faasino i tulafono o loo leoleoina ai tuaoi o atunuu e 21 o loo avea ma sui o le ofisa o matāupu tau femalagaa’iga a le Pasefika e pei ona avea Samoa ma ona nofoaga autū.
Sa aofia i le aumalaga a le Loia Sili ma le Sui Loia Sili mai Amerika Samoa le sui o le malo o Samoa le afioga i le Konesula i totonu o le teritori le susuga Fata Brian Kaio.
