O le tautua a le afioga Letiu Polataivao Tamatoa Penaia i upufai o le malo o Samoa e ala i le tofi faipule o le Palemene mo le itumalo o Aleipata Itupa i lalo e 14 tausaga le umi.
O se tautua sa faaalia e le afioga i le Palemia i le molimau a le malo i toe sauniga o lea tamalii, sa lelei ona faatino ma ua aogā i le atina’e o le atunuu e amata mai le paea’iga faapalemene lona 6 na ulua’i ulufale ai i le Palemene i le tofi faipule o lona itumalo ina ua faato’ā 39 tausaga o lona soifua.
E fā paea’iga a le Palemene na seei ai Letiu i le tofi faipule ma sa avea ai ma Minisita o le Kapeneta mo le Matāgaluega o Galuega Tetele a le malo i le tausaga e 1976 i le 1979.
Na toe filifilia e lona itumalo i le paea’iga na sosoo ai ma ia tauave ai pea le tofi Minisita o le Kapeneta i le Matāgaluega o le Atina’e, a o Palemia le tofa Tupuola Efi.
O isi paea’iga e lua mulimuli ane ai sa avea ma faipule o le Itu Agai a o avea le afioga Vaai Kolone ma Tofilau Eti Alesana ma Palemia.
Se vaega o le molimau a le malo i le sauniga o le tuumalo o le afioga Letiu Polataivao Tamatoa Penaia i le Aso Gafua o lenei vaiaso.
E tuumalo lea ta’ita’i o le malo ma le atunuu i paea’iga ma faigāmalo ua tuana’i mai le tausaga e 1976 e oo atu i le tausaga e 1996 ua 89 tausaga o lona soifua.
O ona toe sauniga sa faatino ai le faaaloalo maualuga faalemalo o le ufiina o lona sa i le tagāvai poo le fu’a o le malo tuto’atasi o Samoa ma tauave lona sa e le vasega o Malu o le Malo.
O le taimi o avea lea tamalii ma Minisita o Galuega Tetele na ulua’i fausia ai le tasi o atina’e o le uafu i Satitoa.
I lana tautua faalelotu i le Ekalesia Metotisi o ia o se tasi o sui sa seei i le Komiti Tumau a lana ekalesia lea na ulua’i filifilia iai i le koneferenisi tele o le tausaga e 1977.
Faaalia e le Failautusi aoao o le Ekalesia Metotisi i Samoa ma atunuu e mamao i lana molimau, e 20 tausaga o galue le afioga Letiu i le Komiti Tumau o se itutino tāua e faia tonu o le ekalesia aoao.
O toe sauniga o le afioga Letiu Polataivao Tamatoa Penaia sa auai le afioga i le Ao Mamalu o le Malo, o le Palemia ma Minisita o le Kapeneta.
O le Pelesetene aoao o le Ekalesia Metotisi sa ta’ita’i i le sauniga lotu faai’u.
