Ua faatoese le Palemia o Papua Niu Kini, James Marape i tagata na aafia i le aveesea faamalosi mai o tagata mai nofoaga i Port Moresby a o faaāta ane se fuafuaga a le atunuu e aveesea ai nofoaga e le’i fuafuaina e nonofo ai ni tagata i le laumua o Papua Niu Kini.
Lipotia e le RNZ talu mai le masina na te’a nei sa faatino ai gaioiga a leoleo i le aveesea o tagata mai ia nofoaga ae ua autausagā o nonofo ai nei tagata i le tele o tausaga ua tuana’i.
I isi nofoaga sa faataututū ai leoleo ma i latou e aumau ai i ia nofoaga ma maliliu ai tagata e to’alua i le masina na te’a nei.
I se pepa o faamatalaga ua ta’ua ai e Marape o mea o loo nonofo ai tagata i le laueleele e lē o lelei ona faamautūina ma faaigoa lelei, e ao ona malamalama i latou ia e ono tula’i mai ai tulaga faapea o le aveesea faamalosi, ma o le naunauta’iga foi o le malo ia lelei ona fuafuaina nofoaga e aumau ai tagata aemaise lava i le laumua.
Ua ta’ua la e le Palemia poo le ogatotonu o le tausaga e faailoa ai le fuafuaga mo le faia o nofoaga ia e fuafuaina lelei mo le aumau ai o tagata o le atunuu ma o le a faia foi faatalanoaga ma i latou e aofia i le matāupu.
Puna o Faamatalaga: https://www.rnz.co.nz/international/pacific-news/586937/png-government-apologises-for-port-moresby-evictions-pledges-permanent-relocation-plan
