Ua ave le fautuaga malosi ma le faamanatu a le Loia Sili a le malo i ta’ita’ifono soofaatasi ma ta’ita’ifono ta’ito’atasi, o tupe o loo faamatuu atu i le poloketi miliona, o meatotino e pulea e le malo.
O lea pule e avanoa ai ona toe faafoi ni seleni mai teugatupe a komiti faavae pe a iai ni tulaga faaletonu e aliali mai.
O lea faamanatu ua taotaotua atu ai ma le tuualalo ia faaaogā e tusa o ala o le tulafono ma ta’iala ua mae’a faataoto e faaaogā iai tupe o le atina’e manuia o tagata o itumalo palota e 51 o le atunuu.
O le folasaga a le tama’ita’i Loia Sili le afioga Mauga Precious Chang ua faailoa ai ma le galuega ua faagasolo a lona ofisa mo le fausia o le tulafono e faatūina ai le pulega o le a feagai ma le faagaioia ma le pulea o lea polokalame o le atina’e o nuu ma afio’aga o itumalo uma.
Le Loia Sili a le malo afioga Mauga Precious Chang.
