Ta’ua e se tasi o alo o Samoa na taalo muamua faapolofesa i le taaloga o le tenisi, le tama’ita’i o Steffi Carruthers Thomsen, e telē lava se galuega e moomia ona fai e faaleleia ai le culture poo se masaniga o loo iai i totonu o le taaloga tenisi.
Na faia lenei faamatalaga a Thomsen, ina ua logotala i se mea na tupu i se tasi foi alo talavou o Samoa ua amata ona iloga mai lona igoa i lea fa’agatama o le tenisi, le tama’ita’i o Destanee Aiava.
O se faasalalauga na faia e Aiava i luga o le social media i le amataga o lenei masina, na ia faasilasila ai lona vave faamavae ese mai le taaloga tenisi, ma sa ia ta’ua ai foi, e iai le si’omaga o loo lotolotoi i totonu o le taaloga, o uiga faailogalanu, faailoga tagata aga’i i tama’ita’i, aga’i i tagata e fiafia i itupa tutusa, ma uiga ma’ema’eā i soo se tasi e lē ‘au atu ia latou faatulagana.
O Aiava e lē taitai ona ‘alo mai le faaali o ona lagona e faailoa ai i latou o loo faia na masaniga.
O le tausaga foi talu ai, ina ua uma se tasi o ana taaloga na iloga ai le mata’ina o lana ta, le 2025 Australian Open, na faaleo ai foi se manatu o Aiava i nisi o faaupuga na faia e nisi e faatatau i ona foliga vaaia.
O lana taaloga mulimuli Grand Slam i lona atunuu i le masina na te’a nei o Ianuari, e le’i manuia taumafaiga a Aiava mo le oo atu i taaloga autū o ‘au ta’ito’atasi poo le main singles, ma na le’i manuia foi le la ‘au ta’ito’alua ma lana paga o Maddison, i le vaega o women’s doubles.
O le tausaga e 2015 na ulua’i fai ai le taaloga faapolofesa a Aiava, ma o ana ausiaga tetele na iai, e aofia ai le manumālō i taaloga e 10 mo ‘au ta’ito’atasi, ma le 14 manumālō i ‘au ta’ito’alua i le vaega a tama’ita’i le ITF Women’s Circuit, ma tula’i mai ai i le tulaga 147 i le faagasologa o teine taaalo i lea taaloga.
I lea tusitusiga a Aiava na faailoa ai lona faamavae mai le taaloga, sa ia faafetai i tagata Pasefika sa lagolago ia te ia, ma ia ta’ua ai, lona mitamitaga i le iai o nisi fanau teine ma tama a le Pasefika e foliga foi pei o ia, o loo iai foi lo latou naunauta’iga e tulitulimatāgau a latou moemitiga.
Ae mo Steffi Carruthers-Thomsen, na ia faaalia i se faatalanoaga ma le Pacific Waves, sa aafia ai foi o ia i masaniga lē lelei nei poo le abuse.
Ma o loo iai le faanaunauga o Curruthers ia maua sona avanoa e fesoota’i atu ai ia Aiava, ma e matuā selau pasene lona lagolagoina o lenei alo talavou o le atunuu.
