O le mae’a o le ta’otoga faapitoa na sa’ilia ai le māfua’aga tonu o le maliu o le tama’ita’i o Papalii Sia Figiel sa taofia i le vaaiga a leoleo i le falepuipui i Tanumalala, o le Aso Toona’i na te’a nei na faia ai ona toe sauniga i le malumalu o le Ekalesia Faapotopotoga Kerisiano Samoa i Matautu i Apia.
Sa auai ona aiga ma uō ma aumea mamae ma faai’u atu ai i le fanua maliu o le malo i Tafaigata ua lagomau ai.
O loo tālia le su’esu’ega o le maliu lilo poo le inquest e faia i le faamasinoga lea o le a tuuina atu iai ma le lipoti a le foma’i na faia le ta’otoga faapitoa.
O le faai’uga o su’esu’ega o le maliu lilo o le a maua ai se faai’uga i le māfua’aga o le maliu.
Sa na o lē ua maliu lona potu sa taofia ai i le falepuipui a o faatali le faai’uga o su’esu’ega a le faamasinoga i moliaga sa molia ai.
O le Aso Faraile na te’a nei sa faatulaga e lau ai lea faai’uga peita’i ua lē taunuu lea laasaga o galuega a le faamasinoga ona ua maliu lē sa molia.
