A o faatali le pulega o malae vaalele a Samoa e amata faatino i le masina fou o Mati le siitaga fou o le lafoga mo tagata e malaga ese ma Samoa le airpot tax, ma le lafoga fou ua ta’ua o le Aerodrome Facility Charge, ua feto’ai lea fuafuaga ma faitioga mai nisi o le atunuu aemaise o le faalapotopotoga o le IATA e gafa ma le faagaioia o malaga a vaalele ma le faia o feuiuia’iga i le totogiina o pasese a tagata malaga i vaalele.
Ua ave ai nei se tusi faaseā mai lea faalapotopotoga faavaomalo ua momoli ai le tuualalo i le minisita o fela’ua’iga ma valele sivili o loo iai foi le vaaia o le pulega o malae vaalele a Samoa, ina ia toe silasila i le siitaga fou po ua fetaui le taimi o le a faatino ai, ma le lavelave o galuega e tatau ona faia muamua e logoina ai tagata malaga.
O le Aso Gafua o le vaiaso nei na logoina ai e le Samoa Airways ana paaga faimalaga poo pasese i le siitaga ma le lafoga fou e selau tālā, ma o le auala lea na silafia ai e le to’atele lea fuafuaga o le a amata faamamalu i le Aso Toonai nei le aso muamua o Mati.
Ua faailoa e le Pule Sili o le pulega o malae vaalele i se lipoti a le nusipepa o le Samoa Observer, e leai se pisinisi a le IATA i totogi fou ua faatulaga ma e lē aiāina foi e lea faalapotopotoga tulafono a Samoa.
O le tusi a le IATA o loo tuuina atu i le Minisita o le pulega o malae vaalele ma fela’ua’iga faapea vaalele sivili le afioga Toelupe Maoiautele Poumulinuku Onesemo, ae o kopi o lea tusi o loo tuuina atu i le Minisita o Tagata Tafafao, o le pule o pulega o malae vaalele ma isi ofisa sinia o auaunaga a le malo e iai o latou sootaga i tagata tafafao, galuega tetele a le malo, ma vaalele sivili.
