E 85 tālā le sala o le kapaka a le Pak’nSave na faate’ia ai se tina i Aukilani mo le 100 minute na tu ai lana taavale i le paka.
Na faate’ia lenei tinā ina ua uma ane lana faatauga o le a alu i le fale, ae faafeto’ai e le ticket ua toetoe o le ‘afa o le tupe sa ia faaalu i lana faatauga, lea o le a toe totogi ai le kapaka.
Fai mai le tinā, o ia e iai lana fanau tama talavou, ma o le taimi e alu ane ai e fai ana faatauga, o se taimi lea ua maua lona to’afilemu mai le vevesi e iai i le fale, o lea e faato’ato’a lelei ai ona fai ana faatauga, e sa’ili’ili lelei oloa ma o latou tau, ma e lē mana’o e faatopelau.
Na ia ta’ua e lē faapea na paka ai iinā lana taavale ae alu e tafaofao solo pe faaaogā foi le paka a le supamaketi ae ese se isi pisinisi na aga’i iai.
Na sa’ili le Herald i le vaega o loo vaaia le kapaka a le faleoloa o le Pak’nSave i Takanini i Papakura, le Smart Compliance Management, ma ta’u ane ai o lea ua toe faaui i tua le ticket na avatu i si tinā lea, ma ua faamautinoa mai foi e le supamaketi, o lea ua tuu atu i luga i le 90 minute e oo i le lua itula le umi e mafai ai e le tagata faatau ona paka lana taavale i le kapaka a le supamaketi.
Puna o Faamatalaga: https://www.nzherald.co.nz/nz/auckland-mum-gets-85-paknsave-parking-fine-for-100-minute-shop-later-waived/SIV2JXSRJ5ACTCJFBXDVLS3PQU/
