Ua tali le afioga i le Palemia i le māfua’aga o le siitaga fou e 15 tālā o le a faaopoopo i le lafoga o le airport tax e 65 tālā o loo iai nei, faapea ma le totogi fou e selau tālā mo le auala o loo savavali atu ai pasese i le vaalele poo le aero bridge.
Ua faaalia e le ta’ita’i o le malo i le feiloa’iga ma tusitala, o se fuafuaga na faamautū i le faigāmalo talu ai lea sa iai ma nisi o le faigāmalo fou ua iai nei.
O le faamalamalamaga a le Palemia susuga Laaulialemalietoa Leuatea Polataivao Fosi o le siitaga o le lafoga mo pasese e malaga ese ma Samoa ma le totogi fou e selau tālā, na ia faailoa ai ma se isi fuafuaga i le toe amatalia i le masina fou o Mati o malaga a vaalele o le Samoa Airways i Maota ma Asau i Savaii.
O se fuafuaga o le a faatino ai ma se suiga fou o le faavalitā lelei lea o malae e taunuu ma oese ai vaalele laiti, ma faapipii mōlī e mafai ai ona faaaogā ia malae vaalele e lua i le po.
O se tasi o māfua’aga tāua o le faaaogā i le po o ia malae vaalele ia mafai ona aumai ai mai Savaii ni gasegase tigāina mo le maota gasegase i Motootua ona e na o le 3 afe tālā le totogi e lele mai ai se vaalele laitiiti ma se gasegase.
O le taimi nei o loo faaaogā vaa o le faalapotopotoga o vaa a Samoa o se isi auaunaga a le malo ae o le totogi e 27 afe tālā e togipau ai mo le aumaia i Apia o se gasegase.
