O atugaluga ua faaleo e le ta’ita’i o le tatou malo i le Palemia i le to’atele o o tatou tagata talavou ua malaga i galuega faavaitaimi, na fesiligia ai le Minisita o le Va i Fafo a Ausetalia le tama’ita’i faipule Senatoa o Penny Wong.
O le tali a le minisita e fai mea faalogo lona malo i atunuu o le Pasefika ma se latou tuualalo.
O le tausaga talu ai, na auai atu ai Samoa i le polokalame fou o visa malaga mo lea atunuu o loo talosaga ai tagata e fia galulue ma nofomau i Ausetalia.
O le polokalame o galuega faavaitaimi a lea malo faapea ma Niu Sila, o isi ia avanoa ua to’atele o tatou tagata ua malaga ma galulue ai.
O lea polokalame ua faaalia e le Palemia susuga Laaulialemalietoa Leuatea Polataivao Fosi, ua toe fetuuna’i ai e le malo le numela o tagata e tatau ona malaga ai.
Ni finagalo o le Minisita o le Va i Fafo a Ausetalia ma le Palemia o Samoa i le feiloa’iga ma tusitala.
O le taoto ai nei i le Palemene a Niu Sila o le taumafaiga a le afioga Anae Arthur Anae ma le mamalu o Samoa i Aotearoa o le visa 3 masina e faato’ā oomi i le tusifolau o tagata Samoa e lē o ni sitiseni Niu Sila ma tagata mai nisi o motu o le Pasefika pe a taunuu i Niu Sila, ua faaalia e le Minisita o le Va i Fafo a Ausetalia, o lona malo ua iai lava lana polokalame mo visa asiasi ma visa tafao.
