O le Aso Gafua o lenei vaiaso ua afea ai lo tatou atunuu e se manuao o se vaa su’esu’e o le fitafita o le sami a le malo o Farani e faamautū i le atunuu o Niu Kaletonia o se teritori o lea malo i le Pasefika.
O le manuao o le Vendemiaire (van day myair) e tolu aso o le a taula ai i le uafu tele i Apia ma o le a faia ai nisi o ana galuega fesoasoani e pei o le toe faaleleia o le falea’oga faata’ita’i o le afio’aga o Pata i Falelatai.
O le a tatala foi mo le maimoaina e nisi o fanau a’oga e pei o fanau mai le a’oga o le Amosa o Savavau, ma fanau o loo a’ooga faaseila i le Iunivesite Aoao o Samoa.
O le a iai ni autaaalo a le atunuu o le a taaalo ma se auvolipolo a le auvaa o lea manuao e faia i se tasi o fale taalo i Tuanaimato.
Ua faailoa e le ofisa o le malo o Farani i Apia,ee o le afea o Samoa e lea manuao o se vaega o ana malaga asiasi i atunuu o le Pasefika, ae o le isi manuao o le fitafita o le sami o lea malo o le a toe afea Samoa i le ogatotomu o le masina fou o Aperila.
O le tausaga nei ua faailoga ai e lea malo le 400 tausaga talu ona faamautū lona malosi faafitafita o le sami e pei ona iai ona vaatau poo manuao.
