O le avetaavale o le taavale lea na soso’a ai se malumalu tapua’i o tagata Iutaia i Michigan i Amerika, ua faailoa mai e le BBC ua maliu.
I le feiloa’iga a le ta’ita’i leoleo mai Oakland County na ia faailoa ai i le autusitala e foliga na aga’i atu le tagata lea i lana taavale e ui atu i faitoto’a o le sunako ua faaigoa o le Temple Israel i West Bloomfield i le faaitu o Michigan.
Na ui atu lea taavale i le hallway o le malumalu ma mū ai auā sa tafana ane lava e sekulati na iai i lea nofoaga.
O se faamatalaga mai le FBI ua faailoa ai o loo faia su’esu’ega ae foliga o se gaioiga na fuafuaina e faasagatau ai i le komiuniti o tagata Iutaia i lea faaitu.
Ua faailoa ane e le Department of Homeland Security o le alii o loo masalomia, o Ayman Mohamad Ghazali, e 41 tausaga le matua, ua avea ma tagatānuu o Amerika; na fanau i Lepanona ae o le tausaga e 2011 na malaga ane ai i le Iunaite Setete ma nofo ai.
E 30 leoleo na ave i le falema’i mo togafitiga ina ua mānavaina le asu mai le taavale.
O le malumalu e pei ona aafia, le Temple Israel o se tasi o nofoaga aupito umi ona iai a le komiuniti o tagata Iutaia i Amerika ma e iai foi ma le a’oga amata, pre-school lea foi na vave ona aveesea mai ai tamaiti ina ua tupu le faalavelave.
O loo tālia nisi faamatalaga mai leoleo pe na māfua i se ā lea gaioiga na ia faia.
Puna o Faamatalaga: https://www.bbc.com/news/articles/cx28zd30078o
