O le fesoasoani a le malo o Ausetalia e tusa ma le 150 miliona tupe Ausetalia e pei ona lipotia le faasafua atu e fesoasoani ai i le atina’e o le taaloga lakapi i atunuu e pei o Fiti, Tonga ma Samoa, o le a leai ni seleni e tuusa’o i pulega o le taaloga i ia atunuu, ae faaaogā e faatupe ai polokalame mo le atina’eina ia lelei ai le taaloga.
Ua faailoa lea fuafuaga i se lipoti a le leitio a Niu Sila, a o tālia ai e Ausetalia ni fuafuaga a pulega o le lakapi a ia atunuu o le Pasefika e aga’i iai tapenaga mo le faatinoina o lea fesoasoani.
O lea foi seleni tele ua fuafua e faaleleia ai nofoaga o loo a’oa’oina ai le taaloga lakapi, faapea le una’ia o le faia o taamilosaga lakapi ta’ito’afitu.
O le auivi o le faatinoina o le fesoasoani a Ausetalia e le’i mae’a ona tapena, e pei ona tālia ai ni fuafuaga e tuuina atu e le pulega o le lakapi a Samoa, Fiti ma Tonga.
