O le taugatā o togafitiga i fafo mo gasegase mai Samoa o loo maua avanoa i le polokalame a le malo e siima’i atu ai i fafo, o Fiti le isi atunuu ua silasila le malo e aofia i lea polokalame.
Ua faailoa e le Minisita o le Soifua Mālōlōina le tofa Vaaaoao Salumalo Alofipo i auala o fesoota’iga a le malo, o se tasi o falema’i tele i lea atunuu ua faaoo mai sona mana’o e fesoasoani ai i le togafitia o gasegase mai Samoa, ma o le māfua’aga lea o le malaga iai o le Minisita e faia talanoaga ma sui o lea falema’i.
O le tāua o Fiti e pei ona faailoa e le Minisita i lea lipoti a le nusipepa o le Savali, o le latalata mai i Samoa auā e iai gasegase e lē gafatia le mamao o Niu Sila ma Initia i le tulaga o malaga a vaalele ona o aafiaga o o latou gasegase.
O le tulaga lelei o Fiti ona e mafai ona aga’i ane iai foma’i o loo galulue i Initia.
E silia i le 10 miliona tālā e faaalu e le malo i le tausaga i le faatupeina o le polokalame o gasegase e togafiti i Initia ma Niu Sila ona e lē mafai ona togafiti i Samoa o latou gasegase.
