Ua tele foi lafoga ma faamatalaga ua lalafo solo e tagata i luga o fesoota’iga televavave, ua fesiligia ai pe o toe fetaui le ta’ita’ia pea e Chris Hipkins o le vaega faaupufai a le Labour, ina ua alia’e mai ai ni tuua’iga a lona to’alua sa iai muamua ae ua lē o toe nonofo nei, le tama’ita’i o Jade Paul.
I se faatalanoaga a le 1News ma Hipkins i le po anapo, na ta’ua ai e le ta’ita’i o le Labour, e na te teena uma lava tuua’iga ua faia faasaga ia te ia, ae e lē o iai sona faamoemoe e faia atili nisi ana faamatalaga e tali atu ai i nei tuua’iga.
Pau le itu o loo mamafa i lona mafaufau, o si ana fanau, ma na ia ta’ua talu mai lava ona tula’i i polokiki, o lona faaeteetega sili lea o lona aiga aemaise lana fanau ina ia aua ne’i toso faatātā atu i ni matāupu faapenei.
O luga o le private page i le facebook a lea tinā na ia faia ai nei tuua’iga i le Aso Sa na mavae atu nei, ma ia ta’ua ai le lē ogatasi o matāupu o loo uuna’ia ma faatāua e le Labour ma lo latou ta’ita’i, ae lē o uiga moni nei sa faaali e Hipkins a o la faatasi.
O le taimi nei ua toe ave i lalo tusitusiga a lenei tinā, e ui o loo tumau lona manatu i le moni o ana tuua’iga.
E tele tausaga na mafuta ai Jade Paul ma Chris Hipkins ae na faato’ā faaipoipo i le tausaga e 2020 peita’i o le tausaga e 2022 na toe tete’a ai, ma e to’alua le la fanau.
O gaioiga ma uiga o loo tuua’ia e Jade na faaalia e Hipkins, e lē o ni gaioiga faasolitulafono.
Ae ina ua faatalanoa le ta’ita’i o le Labour i luga o le show, Ryan Bridge Today i le Herald NOW i le 7.30 i le taeao analeila, na fesiligia ai e Bridge le ta’ita’i o le Labour poo mafaufau pe o toe talafeagai pea le avea o ia ma ta’ita’i, ae na tali Hipkins, ioe, ua mafaufau iai i le itu lea, peita’i o loo matuā ua’i atoa atu lona mafaufau i le faatinoina o lana galuega.
Na ta’ua e Hipkins ia Bridge, e na te lē iloa pe aiseā ua faia ai e lē sa avea ma ona to’alua nei tuua’iga.
Ma na ia faailoa le tele o tusiusiga alofa o fe’au e momoli atu ia te ia talu mai ona tula’i lenei matāupu.
Na fesiligia foi Hipkins pe faamata e lē o iai ni taaviliga faapolokiki na faaosoa maia le faia o nei tuua’iga, ae na ia tali, e talosia e leai.
Puna o Faamatalaga: https://www.nzherald.co.nz/nz/politics/jade-paul-chris-hipkins-ex-wife-on-her-decision-to-post-allegations-to-facebook/ELL3CHYCYRHCFH26NZOSXCGPHM/
