A o faagasolo ai pea le polokalame o loo ta’imua ai le matāgaluega o leoleo, falepuipui ma le toe fuata’ina o le fai atu leai i le faaaogāina o nakoti poo fuālaau faasāina, o lea ua saga tapu’e atili lea polokalame i le faalauiloa o le faiga faavae ma ta’iala e faatino ai le isi vaega tāua o le auaunaga a le matāgaluega.
O lea faiga faavae ma ta’iala e autū i le su’eina o le aufaigaluega i leoleo ma ē o galulue i le vaaia o falepuipui poo latou faaaogā fuālaau faasāina poo drug test.
O se tasi lea o taumafaiga ua taulamua ai le malo e pei ona faatino foi le faia o ia su’ega o fuālaau faasāina mo tagata faigaluega uma a le malo.
Faaalia e le sui komesina o leoleo, falepuipui ma le toe fuata’ina i lana saunoaga i le sauniga na faalauiloa ai le faiga faavae ma ta’iala, o se isi laasaga tāua lea ua faatino ina ia mautinoa le faatāua e le matāgaluega o pulega lelei ma le mautali atu i le tele o lu’itau ma faafitauli ua tutupu ma aliali mai ona o le tagofia o fuālaau faasāina.
O le faanaunauta’iga o lea matāgaluega tāua o loo faamalosia le tulafono, ia amatamea leoleo ma ē uma o auauna ma galulue ai i le taofia ma le tafiesea o fuālaau faasāina.
