Ua iai se mana’o o le malo o Saina e faaaogā le auaunaga a nisi o ona falema’i e togafiti ai gasegase mai Samoa e pei ona faailoa e le Palemia i le fono masani ma tusitala ina ua mae’a le fono a le Kapeneta i le Aso Lulu o lenei vaiaso.
O se mana’o ua faailoa e lea malo ina ua faamautū ai le faaopoopo atu o le atunuu o Fiti e ave iai isi gasegase mai Samoa mo togafitiga, e ese mai i gasegase o loo auina atu i Niu Sila ma Initia.
O le vaiaso nei e valu gasegase ua faamaonia i le polokalame a le malo le maua o avanoa e faia ai o latou togafitiga i fafo ua faaopoopo i isi gasegase ua tuua le atunuu mo Initia ma Niu Sila mo sa’iliga togafiti.
