O le aso ananafi na vaaia ai i magāala eseese i le aai o Aukilani le tele o taavale a leoleo a o taumafai e tuliloa se taavale na sosola ai ni alii e masalomia na latou ulufale faamalosi i le fale o se aiga mo le fuafuaga e faatino se soligatulafono, ma sa latou feavea’ia se ‘au’upega o se sapelu se’i tulou.
O tuliga nei a leoleo ma se taavale gaoi o le ituaiga o le Ford Ranger lanu pa’epa’e, ma o le 10 e te’a ai le 3pm i le afiafi na amata ai nei tuliga mai se fale i Bleakhouse Rd i Howick.
E tele taimi na vaaia ai lenei taavale o alu saoasaoa i le itu sesē o le auala, e pei ona ta’ua e le ta’ita’i leoleo o le Counties Manukau, Shanan Gray.
Ma e tele nisi taavale a le mamalu o le atunuu na lavevea ai pe taso’a atu e lenei taavale a o taumafai e sola ese mai leoleo.
Ta’ua e Gray, ona o le tulaga lamatia na tula’i mai, na faaaogā ai loa le vaega faapitoa faa’au’upegaina a leoleo le Armed Offenders Squad poo le AOS, ma latou tuliloa ai le taavale lea i Queen St.
E tele auala eseese na faaaogā e leoleo e taumafai e poloka mai ai lenei taavale, ma o le auala i K Rd na faato’ā tū ai loa ina ua poloka mai ai e le vaega a le AOS.
E to’atasi le tagata o le to’afā lenei na avatu i le falema’i i ni manu’aga mitimiti ina ua ‘ai e se ta’ifau mai le tuliga, ae o le isi to’atolu na togafiti ai lava i le nofoaga na maua ai i ni manu’a mitimiti.
