Ua amata galue le sui faipule o Vaisigano 2 ua toe filifilia i le palota laitiiti a lea itumalo, i lona tofiga minisita lagolago o le Matāgaluega o le Soifua Mālōlōina ina ua mae’a ona faafeiloa’i aloa’ia e le minisita ma le pulega a le soifua mālōlōina i se sauniga i le Aso Gafua.
O le afioga Motuopuaa Seve Henney Henry Papalii Afelē, o le faipule muamua o le paea’iga 18 a le Palemene na toe faamavae ae foi e filifili Vaisigano 2 ina ua iai le finagalo o le itumalo e suia mai le faipule tuto’atasi ae lagolago i le vaega faaupufai o le Faatuatua i le Atua Samoa ua Tasi.
I le saunoaga a le minisita lagolago i le sauniga na faafeiloa’i ai e le matāgaluega, o lana fautuaga i le au galulue i foma’i ma tausi soifua faapea isi vaega o le soifua mālōlōina, e tāua le galue faamaoni ma le mata ‘ata’ata i taimi uma.
Sa saunoa foi le minisita o le matāgaluega le tofa Vaaaoao Salumālō Alofipo ma momoli moomooga lelei i le minisita lagolago ina ia sao ma uli le faatinoga o ona tiute auā le siitia o le auaunaga faasoifua mālōlōina mo Samoa atoa.
E pei ona silafia o le paea’iga 17 talu ai a le Palemene o le tofi o Vaisigano 2 sa iai i lena paea’iga le afioga Valasi Luapitofanua Toogamaga Tafito Selesele sa tauaveina le tofi minisita o lea matāgaluega tele a le malo.
