Folau faatasi e faama’ite le tamaoaiga, ina ia mausali mo le manuia o Samoa, o le autū lea o le Tala autū lona lua o le Tupe a le faigamalo a le vaega faaupufai o le Faatuatua i le Atua Samoa ua tasi ua taoto nei i luma o le laulau a fono a le Palemene mo le talanoaina i le tuanai o le 14 aso talu ona folasia e le tamaitai minisita o le Tupe le afioga Mulipola Anarosa Ale Molioo i le Aso Lua o lenei vaiaso.
E 964 miliona 835 afe ma le 276 tālā tupe ua fuafuaina e faaalu mo le tausaga faaletupe fou, ae e na o le 789 miliona 906 afe ma le 85 tala tupe maua. O lona uiga e silia i le 174 miliona 929 afe ma le 191 tala tupe o le a sili ai le faaaogā mo fuafuaga o galuega o le tausaga faaletupe 2022 i le 2023.
E ui i lea tulaga ae ua faailoa e le tamaitai Minisita o Tupe o le a siitia le tamaoaiga o le atunuu i le 0 tesimale 6 pasene pe a toe tatala tuaoi faavaomalo masani ia Aokuso. E lē o iai se fuafuaga a le Malo i lana tala autū lona lua o le tupe e siitia lafoga totogi peitai o loo silasila e sii le lafoga o le excise tax i luga o oloa e fesoota’i i faama’i le pipisi.
Ua faailoa foi e le Minisita o Tupe o le 51 miliona tala mo le polokalame o le atiina a’e o itumalo faapalota ua i totonu o fuafuaga faaletupe a le Matagaluega o Tina ma Tamaitai Atiina a’e o Afioga ma Aga Fesoota’i o loo gafa ma lea fuafuaga fou a le faigamalo.
Ua taulai fuafuaga o le tala autū lona 2 o le tupe i ta’iala e aofia ai, le faaleleia o le soifuaga lautele, faalautele o tamaoaiga gafataulimaina, saogalemu ma le faatuatuaina o pulega lelei, siosiomaga malupuipuia ma suiga tetele o le tau, faapea tulaga i galuega a le Malo ma atiina a’e tetele.
