E to’afā nisi o tamalii o le atunuu ua faamaonia e le Kapeneta lo latou filifilia e avea ma ta’ita’ifono o komiti faatonu mo nisi o auaunaga tuma’oti a le malo.
O le komiti faatonu o le faalapotopotoga o faaputugatupe mo le lumana’i manuia o tagata poo le NPF ua ta’ita’ifono ai le afioga Tagaloa Eddie Wilson o se faipisinisi iloga o le atunuu.
O le tofa Lavea Tupa’imatuna Iulai Lavea o le ta’ita’ifono fou o le komiti faatonu o le pulega o le Faletupe o Atina’e, ma o se tamalii sa avea ma Ofisa Sili o le matāgaluega o tupe a le malo i ni tausaga ua mavae.
O le susuga Papalii Siaosi Hansell ua avea ma ta’ita’ifono o le komiti faatonu o le pulega o taaloga tau petipetiga poo le Samoa Gambling Authority, ma le susuga Tupa’i Saleimoa Vaai o le ta’ita’ifono fou o le komiti faatonu o le Pulega o Tagata Tafafao mai Fafo.
Ua faailoa ia tofiga e le afioga i le Palemia i le feiloa’iga ma tusitala i le vaiaso ua mavae.
