O le amataga o le vaiaso na totō ai e le Komesina o Peretania i Samoa afioga David Ward ma le Sui Ofisa Sili o le vaega o le Siosiomaga ma Faasao, Seumalo Afele Faiilagi se laau e faamanatu ai le 70 tausaga o le tautua a le Tupu Tamaitai ia Elisapeta II e lē gata i Peretania ae faapea atunuu uma o Malo o le Taupulega lea e aofia ai ma Samoa.
O le polokalame ua faaigoaina, “The Queens Green Canopy” na amata mai ia Me 2021, o se fuafuaga e totō ai laau mo le faamanatuina o le Platinum Jubilee 2022 a le Tupu Tamaitai lea na valaaulia ai le lalolagi atoa ina ia totō se laau mo lea faamoemoe.
Mo Samoa sa filifilia le laau ua faaigoaina o le “talafalu” ma ua iai le fuafuaga e toe amata faaolaola le laau lea mai Amerika Samoa i totonu o le atunuu.
O se vaega o lea aso faamanatu e silia ma le $33,000 le fesoasoani ua tuuina atu e Peretania mo le faatumauina o le lelei ma le saogalemu o le Vailima Botanical Garden Zoning e ala lea i le faia o ni vaega e mafai ai ona uia e i latou o faaaogā nofoa faapitoa poo wheelchairs lea nofoaga mo maimoaga.
