Ua fautuaina e le Pulega o le Suavai aiga uma mai Vailoa Palauli e oo atu i Lano i Savaii ina ia faaaoga tatau le suavai o loo maua atu i le faatanoa i le nofoaga faamamā suavai i Vailoa Palauli. 

Ua afua lea tulaga ona ua molimauina e le Ofisa o Vaai Tau tulaga maualalo o le suavai timu maua i vaega eseese o le atunuu o loo maua ai faamaumauga a le Ofisa i lea tulaga taua ma ua siitia ai ma laasaga e ao ona nofouta iai le atunuu i le faaono faaitiitia ai o le suavai maua i faatanoa vai o loo maua ai le suavai taumafa. 

E oo atu i le 20 nuu i lea vaega o le motu o Salafai ma ua faaalia e le Pulega o le Suavai e faaono faaauau pea lea tulaga faaititia o le suavai pe a faaauau uiga o le tau ua iai nei i le ititi o timuga e palasi e maua ai le suavai i le nofoaga faamamā suavai i Vailoa Palauli lea o loo maua ai e ia nuu ma afioaga auaunaga taua e manaomia e tagata i aso uma. 

Ua tuu atu ai fautuaga i lea vaega o le motu tele ia faaaoga fuafua le  suavai e ala i le taofi o le fufuluina o taavale ma le fui o laau ma vave ripoti ni paipa o faaletonu ma a maua foi ni timuga ona faatali lea o le suavai e faaaoga mo nisi fuafuaga tatau a le aiga. 

O faamaumauga a le Ofisa o le Vaai Tau i le 3 masina ua tuanai seia oo i le masina nei o Aperila o le tausaga nei ua faamauina ai tulaga ma’ale’ale i le faaititia o suavai maua i timuga ma ua feagai ai le atunuu ma lapataiga o le tau pa’aā i le malosi o mugālā ma mafua ai ona mātūtū le eleele.