O le faamanatuina o le aso faavaomalo o tinā ma tama’ita’i o le lalolagi i lenei masina, ua faatāua ai e Samoa i lenei vaiaso le tautua ma le sao o tinā ma tama’ita’i i soo se galuega ma auaunaga, e lē gata i totonu o nuu ma aiga, ae o totonu o le malo ma auaunaga tuma’oti.
O le Aso Lulu o lenei vaiaso e faia ai se tasi o faatasiga e faatāua ai lava le sao o tinā ma tama’ita’i, e ala i se fetufaa’iga a tama’ita’i o galulue i galuega faasalalau i soo auala o fesoota’iga o le a talimalo ai le faalapotopotoga o tama’ita’i o Malo Aufaatasi le UN Women.
O se faatasiga o le a fetufaa’i ai tama’ita’i o loo tautua i lea tomai i auala e siitia ai le latou auaunaga ma fesoasoani ai i le tele o lu’itau o feagai ma latou i le faatinoga o lea tautua.
O se tasi o faatāua ma amana’ia o tinā ma tama’ita’i i lea aso faailogaina faavaomalo, o le sisiina o le tagāvai o le fu’a o le malo tuto’atasi o Samoa i lumāmaota o le malo i le Aso Gafua lea sa fulisia i tama’ita’i o galulue faaleoleo sa auai i le faatinoga o le savali ma le sisiina a’e o le fu’a.
