Ua faatonuina e le faamasino sinia o le Faamasinoga Maualuga se lipoti a le ofisa faanofo vaavaaia poo le probation office, e fua iai se faasalaga o se alii 16 tausaga le matua ua faamaonia ona moliaga e tolu e fesoota’i i se gaioiga solitulafono na aafia ai se teineitiiti laitiiti sa 11 tausaga ma le iva masina le matua i le taimi na aafia ai i le solitulafono.
E tupu foi le gaioiga matagā ua faamaonia o loo a’oga lē na aafia ma o loo i le vasega Tausaga 8.
O faamaumauga a leoleo o loo faailoa ai e le faamasinoga i lana faai’uga o lē ua molia ma le na aafia e iai so la sootaga faaleaiga o se tausoga.
O le māfua’aga lea ua matuā tapu ai ona faailoa soo se faamatalaga e iloa ai lea sootaga.
O Iuni o le tausaga e 2024 na tupu ai le solitulafono ae o le masina o Setema o le tausaga na te’a nei na su’esu’e ai molimau e pei ona sa tetee lē ua molia.
O le masina na te’a nei o Fepuari na faamae’a ai folasaga a loia ma aumai ai le faai’uga i le masina lenei o Mati.
E lima moliaga sa tuua’ia ai lē ua molia, tolu ua faamaonia ae lua ua teena ma faalēaogāina.
O moliaga o le taumafai e faatino se fesoota’iga tau faiaiga.
