Ua faailoa lautele e le pulega a le Lakapi Samoa le faamavae ai o le susuga Tuilaepa Lupesoliai Sailele Malielegaoi ma le tofi ta’ita’ifono o le Komiti Faafoe o le pulega o le Lakapi Samoa i le aulia ai o le 26 tausaga o seei Tuilaepa i le tofiga, e ese mai i le 35 tausaga o lotolotoi o ia i galuega o le atina’e o le taaloga lakapi i Samoa.
O le faamavae o lea tamalii o se toe Ulutaia i le taaloga o upufai o malo e pei ona seei i le tofi faipule o lona itumalo o Lepa mo le silia i le 40 tausaga ae sa avea ma Palemia mo le 22 tausaga, o loo tulai nei o le ta’ita’i o le Itu Agai ma le vaega faaupufai e puipuia aiā tatau a tagata, o lona sao i le atina’e o le lakapi ua faafetaia e le pulega o le taaloga i le atunuu.
O le Aso Faraile ua mavae e pei ona faailoa e le susuga Tuilaepa Lupesoliai Sailele Malielegaoi i auala o faasalalauga a lana patī faaupufai, sa ia taloina ai le fono a le pulega o le Lakapi Samoa ma faailoa iai lana faai’uga e faamavae pe a mae’a lona taimi i le tofiga.
O le tausaga e 2000 na faamavae ai se tasi o tamālii sa avea ma ta’ita’ifono le susuga Laauli Allan Grey ma see atu ai Tuilaepa i le tofiga ma o tausaga sa tautua ai o le ta’ita’ifono o le Komiti Faafoe o le lakapi sa siitia maualuga ai le tulaga o Samoa i le lalolagi i le taaloga lea na ausia ai e le aulakapi tele o le Manu Samoa le tulaga fitu.
Ua faailoa e le Lakapi Samoa le see atu ai o le susuga Papalii Namulauulu Sami Leota o loo avea ma Pelesetene o le lakapi a Samoa e tauave le tofiga ta’ita’ifono mo se taimi, e tālia ai le filifiliga o se ta’ita’ifono fou.
