O le masina o Me i lona vaiaso muamua o le a faagasolo ai le fono o le Atoa o Samoa e talimalo ai lo tatou malo, lea ua faatulaga e lua aso e tauaofia ai i Upolu ae tasi i Salafai.
Ua faailoa e le ta’ita’i o le malo le afioga i le Palemia o le feiloa’iga ma le Kovana Sili o Amerika Samoa ina ua malaga mai i Apia i le masina ua mavae ona o le malaga asiasi mai i Samoa o le sui failautusi o le malo o Amerika, na faamautū ai ma aso o lea fonotaga i le va o ta’ita’i o malo o Samoa ma Amerika Samoa.
Ua faailoa ai foi e le Palemia susuga Laaulialemalietoa Leuatea Polataivao Fosi i le fono ma tusitala i le vaiaso ua mavae, le pasia e le Kapeneta o le fausia loa o le nofoaga tutotonu mo le ofisa o le malo o Samoa i totonu o le teritori.
O le fono a le Atoa o Samoa o se faatasiga o ta’ita’i o faigāmalo a Samoa e lua e talanoaina ai atina’e mo le manuia o malo ma ona tagata aemaise e talanaoina ai ma soalaupule fuafuaga mo le faaleleia o tamaoaiga o malo i le itu i faato’aga ma faigāfaiva, fefaataua’iga, femalagaa’iga, tagata tafafao, ma le leoina o tuaoi faavaomalo mai gaioiga solitulafono e pei o le feavea’iina o nakoti poo fualaau faasāina.
