O le 48 itula poo le lua aso talu ai mai le aso muamua i le aso 3 o Iuni ua molimauina ai pea le palasi o le numera o tagata i le atunuu ua maua i le Koviti-19, e 128, faatusa i le lipoti o le aso 30 o Me e oo i le aso muamua o Iuni e 149 gasegase o le faama’i na faamauina ai.
Ae o le lipoti lata mai ua ta’ua ai e to’a sefulu gasegase o loo taofia i nofoaga faapitoa i le maota gasegase i Motootua ae leai ni gasegase o taofia i potu tigaina. O le lipoti foi lea o le lua aso mai le aso muamua i le aso 3 o Iuni e leai se soifua na fano i le faama’i.
O loo faatumau pea fautuaga a le soifua mālõlōina o le tausisia o puipuiga lautele peitai ua molimauina foi ua tele ina le faatāua e le atunuu le fautuaga o le faia o puni fofoga. O loo faatumau pea faasalaga tupe o le lē usitaia o poloaiga o vavao ona o puipuiga o Samoa mai le faama’i ma ua toe faaopoopo foi le isi fā vaiaso o le iai pea o le tatou atunuu i poloaiga o faalavelave faafuasei le state of emergency.
