Ua lua nei setete o Ausetalia ua lipotia mai ai le alia’e ai o le faama’i o le foot and mouth lea o loo popole iai le to’atele ina ne’i aafia ai meaola poo manu papalagi i le atunuu.
Ua ta’ua e le 7News i le vaiaso nei ua faalogoina ai ni valaau ina ia tapunia tuaoi o le atunuu ina ia malupuipuia ai meaola mai lenei faama’i.
O le malaevaalele i Adelaide lea ua lipotia na maua ai vaega o le faama’i lea i ni oloa o povi na aveina ane e pasese ae lei faailoaina.
Fai mai o se tagata na malaga mai mai Indonesia lea na aumaia ia oloa. O le amataga o le vaiaso na mua’i lipotia mai ai le alia’e o vaega o le vairusi lea i Melepone. O loo unaia tagata malaga uma ina ia silasila toto’a i tulaga tau le puipuiga pe a malaga mai i Ausetalia ma ia mautinoa e faamamā seevae pe a taunuu mai i malaevaalele.
Fai mai le aufaigaluega i tuaoi o le atunuu o le maua o nei tulaga e iloa ai o loo aogā le system o loo o latou faaaogāina.
